L-Uffiċċju tal-Evanġelizzazzjoni tal-Kurja tal-Isqof ta’ Għawdex jassisti lill-Isqof fil-missjoni li jħabbar u jxerred il-Vanġelu, sabiex kull persuna tkun tista’ tiltaqa’ ma’ Ġesù Kristu, tagħraf l-imħabba tiegħu u tidħol dejjem aktar fil-ħajja tal-Knisja. L-Uffiċċju jippromovi kultura ta’ evanġelizzazzjoni li tħeġġeġ lill-komunitajiet parrokkjali u lill-entitajiet djoċesani biex ikunu dejjem aktar missjunarji, miftuħa u preżenti fost in-nies.
Permezz ta’ inizjattivi ta’ evanġelizzazzjoni, formazzjoni u akkumpanjament, l-Uffiċċju jfittex li jilħaq kemm lil dawk li jgħixu b’mod attiv il-fidi kif ukoll lil dawk li tbiegħdu mill-ħajja tal-Knisja jew li għadhom ma ltaqgħux mal-messaġġ tal-Vanġelu. Huwa jrawwem kollaborazzjoni bejn il-parroċċi, il-movimenti, l-għaqdiet u l-uffiċċji pastorali tad-Djoċesi, sabiex il-ħidma ta’ evanġelizzazzjoni tkun kordinata u effettiva.
L-Uffiċċju jħeġġeġ ukoll lill-fidili kollha jagħrfu s-sejħa tagħhom biex ikunu dixxipli missjunarji, billi jagħtu xhieda tal-Vanġelu fil-familja, fuq il-post tax-xogħol, fl-ambjent soċjali u fil-komunità. B’dan il-mod, l-Uffiċċju jikkontribwixxi biex id-Djoċesi ta’ Għawdex tkun Knisja li toħroġ tiltaqa’ man-nies, tisma’, takkumpanja, tħabbar lil Kristu u tibni komunitajiet ħajjin ta’ fidi, tama u mħabba.
