Sors: Facebook
Fl-okkażjoni tal-Festa ta’ San Ġwakkin u Sant’Anna, nanniet ta’ Ġesù, l-Erbgħa 26 ta’ Lulju, l-Isqof Anton Teuma ċċelebra l-quddiesa mar-residenti u l-istaff tar-Residenza Sant’Anna, fl-Isptar Ġenerali ta’ Għawdex.
Fl-omelija ċkejkna huwa rrefera għat-tbatijiet li ngħaddu minnhom fil-ħajja tagħna, kif għaddew ukoll Sant’Anna u San Ġwakkin meta saru jafu li binthom Marija tqalet. Imma l-wasla ta’ Ġesù ġabitilhom ukoll ferħ kbir.
L-Isqof Anton wiegħed lill-morda u anzjani preżenti fis-sala tar-Residenza Sant’Anna li jitlob għalihom biex jirnexxilhom iġorru s-salib tat-tbatija.
Mal-Isqof ikkonċelebra wkoll Dun Joe Cardona, Kappillan tal-Isptar.
Il-ġurnata ta’ qabel, l-Isqof ta’ Għawdex iċċelebra wkoll quddiesa f’Casa Amalia, faċilità fil-Belt Victoria għal anzjani b’dimentia.
