Is-Servizzi Soċjali fi ħdan is-Segretarjat għall-Edukazzjoni Nisranija joffru appoġġ professjonali lill-istudenti u lill-familji fl-iskejjel tal-Knisja, bil-għan li jissaħħu l-iżvilupp ħolistiku, il-benesseri u s-suċċess edukattiv ta’ kull student.
Is-servizz jinkludi l-ħidma ta’ ħaddiema soċjali, counsellors, psikologi edukattivi, youth workers, career advisors u professjonisti oħra, li jaħdmu flimkien mal-iskejjel, l-istudenti u l-ġenituri biex jidentifikaw u jindirizzaw diffikultajiet personali, familjari, soċjali u edukattivi. Tingħata wkoll għajnuna f’każijiet ta’ bullying, diffikultajiet fl-imġiba u l-integrazzjoni, kif ukoll fl-identifikazzjoni u l-appoġġ tal-ħtiġijiet edukattivi u speċjali tal-istudenti.
Is-Servizzi Soċjali jikkollaboraw mill-qrib mat-tmexxija tal-iskejjel u ma’ servizzi u aġenziji oħra, sabiex l-istudenti u l-familji jkunu jistgħu jingħataw l-għajnuna meħtieġa f’ambjent li jirrispetta d-dinjità tagħhom. B’dan il-mod, is-Segretarjat jikkontribwixxi għall-missjoni tal-iskejjel tal-Knisja li joffru edukazzjoni li tgħaqqad il-formazzjoni akkademika, umana, soċjali u Nisranija.
