Id-Difensur tal-Vinkolu huwa uffiċjal tat-Tribunal Ekkleżjastiku li għandu r-responsabbiltà li jħares l-integrità tar-rabta sagramentali taż-żwieġ u tal-Ordnijiet Sagri fil-proċeduri ġudizzjali tal-Knisja, b’mod partikulari fil-kawżi ta’ dikjarazzjoni ta’ nullità taż-żwieġ.
Fil-qadi tal-missjoni tiegħu, id-Difensur tal-Vinkolu jissalvagwardja l-prinċipju li ż-żwieġ u l-Ordnijiet Sagri għandhom jitqiesu validi sakemm ma jiġix ippruvat il-kuntrarju skont il-liġi tal-Knisja. Huwa jeżamina b’attenzjoni l-kawżi mressqa quddiem it-Tribunal u jippreżenta l-osservazzjonijiet tiegħu sabiex jiġi żgurat li kull talba għal dikjarazzjoni ta’ nullità tiġi studjata b’serjetà, oġġettività u fedeltà lejn id-Dritt Kanoniku u t-tagħlim tal-Maġisteru tal-Knisja Kattolika.
Permezz tas-servizz tiegħu, id-Difensur tal-Vinkolu jikkontribwixxi biex il-proċess ġudizzjali tal-Knisja jkun eżerċitat b’ġustizzja, verità u ħarsien tad-dinjità tal-persuni involuti, filwaqt li jħares il-qdusija u l-indissolubbiltà tar-rabtiet sagramentali.
