Il-Fondazzjoni Arka hija organizzazzjoni volontarja u mhux governattiva li taħdem għall-ġid, id-dinjità u l-inklużjoni tal-persuni b’diżabbiltà u tal-familji tagħhom, filwaqt li tippromovi d-drittijiet u l-potenzjal ta’ kull persuna.
Il-proġett tal-Arka beda fl-1995, meta Mons. Emanuel Curmi għaraf il-ħtieġa ta’ Respite Centre f’Għawdex li joffri kura, għajnuna u serħan lill-persuni b’diżabbiltà u lill-familji tagħhom. Il-Knisja ta’ Għawdex tat art f’Għajnsielem, qrib il-port tal-Imġarr, u flimkien ma’ grupp ta’ Għawdxin dedikati beda jiżviluppa dan il-proġett, li wassal għat-twaqqif tal-ewwel Respite Centre tax-xorta tiegħu f’Għawdex.
Dar l-Arka fetħet uffiċjalment fit-3 ta’ Diċembru 2000. Illum toffri kemm akkomodazzjoni permanenti u kemm servizz ta’ respite, flimkien ma’ faċilitajiet terapewtiċi u rikreattivi, fosthom żewġ pools terapewtiċi, multi-sensory room u ġnien għall-użu tar-residenti u tal-persuni li jużaw is-servizzi tagħha. Id-dar tista’ takkomoda sa 32 persuna f’madwar 20 kamra, li iktar minn nofshom huma en-suite.
Il-Fondazzjoni kompliet tiżviluppa l-ħidma tagħha favur ħajja aktar indipendenti u integrazzjoni fil-komunità. Fl-2016 infetħet Dar il-Ġublew tal-Ħniena, filwaqt li fl-2022 ġiet inawgurata Dar il-Madonna Ta’ Pinu. Kull waħda minn dawn id-djar tista’ takkomoda ħames residenti, u jkomplu jiżviluppaw proġetti oħra ta’ akkomodazzjoni fil-komunità biex aktar persuni b’diżabbiltà jkunu jistgħu jgħixu b’mod aktar indipendenti filwaqt li jibqgħu integrati fis-soċjetà.
Il-proġetti kollha tal-Fondazzjoni huma mmexxija b’attenzjoni għall-kura, is-sigurtà, l-awtonomija u d-dinjità tar-residenti, u d-djar tagħha huma liċenzjati mill-awtoritajiet kompetenti.
Il-Fondazzjoni Arka għandha rabta partikulari mal-Knisja ta’ Għawdex: Dar l-Arka nbniet fuq art mogħtija mill-Knisja lokali, u l-proġett twieled minn inizjattiva ekkleżjali mmexxija minn Mons. Emanuel Curmi flimkien ma’ lajċi Għawdxin. Illum il-Fondazzjoni tkompli topera bi spirtu ta’ servizz lejn il-persuna u lejn il-familja, filwaqt li taħdem biex tgħin lill-persuni b’diżabbiltà jgħixu ħajja sħiħa u parteċipattiva fil-komunità.
Permezz tal-ħidma tagħha, tal-ħaddiema u tal-voluntiera tagħha, Fondazzjoni Arka tkompli twessa’ s-servizzi tagħha biex tilqa’ għall-ħtiġijiet li jinbidlu tal-persuni b’diżabbiltà u tal-familji tagħhom u tikkontribwixxi għall-bini ta’ soċjetà aktar inklużiva, li tirrispetta d-dinjità u d-drittijiet ta’ kull persuna.
