Il-Kummissjoni tas-Safeguarding tad-Djoċesi ta’ Għawdex ġiet imwaqqfa fl-2022 biex taħdem mill-qrib mal-Kummissjoni tas-Safeguarding ta’ Malta. Fl-2024, flimkien mal-Kummissjoni tas-Safeguarding ta’ Malta, mal-Konferenza Episkopali Maltija u mal-Kunsill tas-Superjuri Maġġuri tar-Reliġjużi, il-Kummissjoni tas-Safeguarding tad-Djoċesi ta’ Għawdex adottat Safeguarding Policy li tiddefenixxi l-ħidma tagħha.
Il-Kummissjoni tas-Safeguarding hija impenjata li tippromovi kultura ta’ ħarsien u ambjent sigur fil-Knisja, fejn id-dinjità, il-ġid u s-sigurtà tat-tfal u tal-adulti vulnerabbli jkunu dejjem prijorità. Dan l-impenn għandu l-għeruq tiegħu fil-ġustizzja naturali u fil-missjoni ta’ Kristu, li fil-Vanġelu wera mħabba, rispett u attenzjoni speċjali lejn it-tfal u lejn dawk l-aktar dgħajfa.
Kull forma ta’ trattament ħażin, abbuż jew sfruttament ta’ minuri u ta’ persuni vulnerabbli tmur kontra d-dinjità tal-persuna umana u hija inkompatibbli mal-missjoni, it-tagħlim u l-liġijiet tal-Knisja. Għalhekk, il-Knisja f’Malta u Għawdex tħabrek biex tibni ambjenti fejn kulħadd ikun jista’ jħossu milqugħ, rispettat u protett.
Permezz tal-ħidma tagħha, il-Kummissjoni tgħin biex il-Knisja f’Għawdex tkun komunità li tħares b’mod konkret il-vulnerabbli, tippromovi l-ġustizzja u l-verità, u tibqa’ fidila lejn il-missjoni tagħha ta’ mħabba u servizz lejn kull persuna.
Il-Funzjonijiet tal-Kummissjoni tas-Safeguarding
Il-Kummissjoni tas-Safeguarding hija entità mwaqqfa mill-Konferenza Episkopali Maltija u mill-Konferenza tas-Superjuri Maġġuri Reliġjużi, u hija responsabbli b’mod ġenerali li tippromovi ambjenti siguri fil-Knisja.
Il-funzjonijiet tal-Kummissjoni tas-Safeguarding huma li:
Tagħti pariri lill-Ordinarji dwar kwistjonijiet ta’ safeguarding.
Tiżviluppa u tirrevedi l-policies u l-proċeduri relatati mas-safeguarding.
Tikkollabora mal-mexxejja tal-entitajiet tal-Knisja fi kwistjonijiet ta’ safeguarding.
Toffri taħriġ fil-prevenzjoni b’kollaborazzjoni ma’ entitajiet edukattivi.
Tagħmel riċerka dwar is-safeguarding b’kollaborazzjoni ma’ entitajiet ta’ riċerka.
Tirrakkomanda pjanijiet għall-immaniġġjar tar-riskju.
Tikkordina verifiki fl-entitajiet tal-Knisja biex jiġu żgurati l-istandards tas-safeguarding.
Tissorvelja u tappoġġja lid-Designated Safeguarding Officers.
Tagħmel valutazzjonijiet tar-riskju u/jew investigazzjonijiet preliminari fuq talba ta’ Ordinarju.
Tirrevedi rapporti ta’ investigazzjonijiet preliminari u/jew ta’ valutazzjonijiet tar-riskju fuq talba ta’ Ordinarju.
Tieħu ħsieb u tirrappreżenta lill-ilmentaturi, lill-vittmi u lill-vittmi sekondarji.
Tikkollabora mal-Ordinarji fil-kura tal-ġid ta’ dawk li jkunu s-suġġett ta’ lment.
Tikkollabora mal-Pulizija, mad-Direttorat għall-Protezzjoni tat-Tfal u ma’ aġenziji statutorji oħra.
Iżżomm ir-relazzjonijiet mal-pubbliku u mal-midja fi kwistjonijiet ta’ safeguarding.
L-Organigramma tal-Kummissjoni
Rapporti Annwali
Agħfas fuq ir-rabtiet hawn taħt biex tniżżel ir-rapporti annwali tal-Kummissjoni:
Il-Policy tas-Safeguarding
Aqra l-Safeguarding Policy adottata mill-Knisja f’Malta u Għawdex.
